麥克阿瑟唔赦流浪者|東方日報

近5次對賽未輸過

元旦日澳職上演前列大戰，西悉尼流浪者主場對FC麥克阿瑟。西悉尼流浪者明顯跌Watt，相反約基帶隊嘅FC麥克阿瑟有反彈迹象，加上近5次交手未輸過，仲有得受讓咁筍，讓球客勝咪錯過。（myTV SUPER周日下午2時直播）

西悉尼流浪者雖然排名較高，主帥魯丹早前仲獲選每月最佳領隊，但喺世盃後聯賽重開表現回落，近3仗聯賽只得2和1負未贏過，對手只係中游分子布里斯班獅吼、威靈頓鳳凰及西部聯，似乎世盃後仍未撻番着副偈。

阿拉保利腳風順

相反，由曼聯名宿約基執教嘅麥克阿瑟有反彈迹象，連同世盃前一仗在內，近4仗聯賽取得3勝1負，近兩仗更保持清白之身，格魯吉亞前鋒阿拉保利成功開齋不特止，近2仗聯賽共入3粒，包括上仗贏FC悉尼3比0之役梅開二度，腳風轉順，就算防中丹尼爾達施華受傷都冇有怕。翻查紀錄，雙方過去曾5次正面交鋒，麥克阿瑟取得3勝2和不敗佳績，擺明唔驚西悉尼流浪者，寧買當頭起，受讓必捧讓球客勝。