地頭龍賓菲加大開殺戒|東方日報

同一時間歐聯16強次回合另一場賽事，葡超勁旅賓菲加挾首回合領先2比0優勢，返主場迎戰比甲球隊布魯日，再下一城機會極大。賓菲加主場向來煞食，唔少歐洲名牌嚟到都被打爆，布魯日依家狀態低迷，賓菲加可以放膽搶攻，捧2.5球入球大穩陣！（Now 644周三凌晨4時直播）

賓菲加係上屆歐聯8強分子，實力同經驗都夠晒保證，佢哋喺主場表現特別出色，近5仗歐聯主場錄得4勝1和佳績，當中包括打和巴黎聖日耳門同4比3大破祖雲達斯，主場火力相當驚人。賓菲加近7仗歐聯主場賽事，有5場總入球開3球或以上，射手干卡路拉莫斯狀態大勇，有力繼續數胡。

布魯日焗攻易失波
布魯日係今屆分組賽最令人驚喜球隊，但自從上年底改聘英格蘭主帥柏加執教後，球隊演出令人失望，首回合主場照吞賓菲加兩蛋後，今仗作客只能盡地一煲焗攻，更會令防守暴露更多漏洞，佢哋上仗慘吞奧斯坦德3蛋，今仗勉強搶攻只會製造更大災難，開入球大機會極高。