世南美：巴西托弗狂擦魚腩_東方日報

世盃外南美洲區賽事，巴西主場出擊迎戰玻利維亞，「森巴兵團」主場第一擊，定必有所表現，對手玻利維亞防守疲弱，經常大敗，加上巴西近3場世盃外全勝之餘，全部贏4球或以上，就算讓到3球、3球半，都照捧上盤。

（HOY TV 77台周六早上8時45分直播）
巴西去年底卡塔爾世盃8強互射12碼慘遭克羅地亞淘汰，賽後主帥迪迪下台，巴西足總屬意皇馬教練安察洛堤接手，願意等佢一年，因此巴西目前未有正式主帥，僅由看守領隊迪尼斯領軍，不過球隊粒粒皆星，唔使教練都識贏波，王牌前鋒尼馬繼續領軍，中場亦有隊長卡斯米路坐鎮，「阿仙奴孖寶」加比爾捷西斯同加比爾馬天尼利當弗，靠呢條豪華鋒線，入波冇難度。

玻利維亞防線穿窿
至於玻利維亞上屆世盃外排第9名，18場共失42球，係10支南美球隊當中，失球最多一隊，可以話係「南美魚腩」，近年鮮有球員到歐洲搵食，欠缺磨練，睇番上屆世盃外，佢哋主客兩場對巴西都大敗，包括作客吞5蛋主場亦輸4球，今場巴西讓3球、3球半睇落讓得辣，但上盤都玩得過。

尼馬李察利臣訓練場開拖？
巴西國家隊近日訓練時發生事故，周三為世盃外進行操練時，今夏轉戰沙特阿拉伯後仍未上陣嘅尼馬，喺練習中一度受傷離場，經軍醫治療後再重返訓練場，點知操練途中，李察利臣「唔收腳」踢向尼馬，尼馬疑似發火起腳踢番李察利臣報復，唔係內訌啩？