世南美:巴西征秘魯細盤穩陣

巴西征秘魯細盤穩陣世界盃外圍賽南美洲區巴西乘勝追擊，聽朝作客秘魯力爭連勝。「森巴兵團」上輪主場大炒玻利維亞5比0，一眾主力都有好表現，不過南美球隊主客反差極大，加上賽程緊密，巴西遠征秘魯未必能贏得咁輕鬆，加上佢哋近5場世盃外作客，有4場總入球係2球或以下，寧願博中位數2.5球嘅入球細。（周三早上8時開賽）南美波作客打折扣巴西首場大勝5球，只因對手玻利維亞太弱，基本上放棄作客，寧願靠高原主場搶分。今場「森巴兵團」作客可能又係另一回事，因為南美球隊主客場表現有好大分別，細看首輪外圍賽5場戰果，有4場由主隊獲勝，只有1場打和，秘魯正係首輪唯一作客仍能全身而退嘅球隊，實力唔算太曳。秘魯首仗作客2比2逼和巴拉圭，效力沙特阿拉伯勁旅希拉爾嘅前鋒安祖卡里路梅開二度，其餘隊友散布於美職、西甲、法甲及南美各地，首輪作客都搶到分，球隊士氣自然好。預料秘魯今仗返主場，應會以硬淨踢法應付巴西來犯，再以快速反擊騷擾對方後防，巴西要贏波絕非易事，估計入球亦唔會多，入球細係最佳選擇。