玻利維亞入球大「魯」定

玻利維亞入球大「魯」定

美洲盃8強演最弱戲碼！玻利維亞及秘魯分別以小組次名晉身次圈，不過如果有睇佢哋分組賽演出，都幾肯定如果強隊肯認真應付佢哋，佢哋一定係陪跑份子，不過既然仲有一場，甚至兩場時間搵錢，就一定唔放過機會；當中秘魯雖然青黃不接，不過前鋒比沙路等都仍然有心有力，而玻利維亞小組賽3戰失7球都可以晉級，真係充分反映呢個賽事水平有幾參差。當全世界都以為呢啲波大家冇高低會悶和收場時，隨時就放開懷抱咁鬥攻一場你睇，一於反其道而行，睇好呢場出現入球騷。（周四1，now681台周五7:30am直播）

玻利維亞喺小組入3球失7球都可以次名晉級8強，除咗自己夠運之外，都真係多得厄瓜多爾同墨西哥自相殘殺，因為分組最後一戰，當時厄瓜多爾賽前僅得0分，贏都係九成攬住墨西哥出局，結果厄瓜多爾真玩攬炒損人不利己，先有玻利維亞4分次名出線呢個局面。

秘魯前線多尖刀

而事實上，玻利維亞向來離開主場都係南美魚腩之一，前仗半場領先厄瓜多爾3球，有幾可疑大家重睇一次就明白，上場大敗予智利至係佢哋真身，而去到呢個淘汰階段強隊都唔敢再玩嘢之下，呢隊波都係時間行人止步。
對比起玻利維亞，秘魯實力上係有多少優勢，至少前鋒比沙路、法芬、安達卡里路都係有名氣球員，而且分組賽都只曾僅敗予巴西，反映出佢哋闖入次圈都唔算負碌，而今場普遍都認為，兩隊分組賽加埋6場波都只入過5球，有咩可能會多波入，但呢個美洲國定盃向來都好多嘢估唔到，尤其呢啲弱隊之間對碰，明知過多一關都係出局，倒不如盡地一煲，打場娛樂性足球俾觀眾，爆出冷門幕後人又肚滿腸肥，何樂而不為，一於起身等睇入球騷。